Betlehem, 24 dhjetor 2011, NOA - Mijëra pelegrinë nga mbarë bota kanë mbërritur në Betlehem për të festuar lindjen e Jezu Krishtit.
Nata e shenjtë do të kulmojë me meshën që do të mbahet në Katedralen e Lindjes së Krishtit, raporton agjencia e lajmeve NOA.al.
Pavarësisht krizës financiare që ka mbërthyer shumë vende të Europës, numri i vizitorëve në shpellën e shenjtë të Betlehemit parashikohet të arrijë në 90 mijë.
Ministria izraelite e Turizmit ka njoftuar se numri i pelegrinëve do të shënojë rekord edhe për faktin se konflikti me Palestinën ka njohur zbutje dhe shumë banorë të Bregut Perëndimor do të vizitojnë Betlehemin.
Betlehemi rrethohet nga një mur i lartë që Izraeli ka ndërtuar rreth Bregut Perëndimor.
Të gjithë pelegrinët, që mbërritën në Betlehem, përfshi dhe klerin, kaluan në një kontroll të imtësishëm sigurie.
Kryebashkiaku i Betlehemit, Viktor Batarseh u shpreh në mesazhin e tij të urimit se festimet e sivjetshme do të sjellin palestinezët me afër njëri-tjetrit dhe më afër ëndrrës për krijimin e një shteti palestinez.
Sivjet Palestina zuri një vend në UNESCO, ndërsa bëri kërkesë për anëtarësim në Organizatën e Kombeve të Bashkuara.
mit/NOA
