Kryetarja e Kuvendit, Jozefina Çoba Topalli priti sot professor Cherif Bassiouni një ndër ekspertët më të mirë të së drejtës penale, i njohur edhe si “babai i të drejtës ndërkombëtare penale”.
Zoti Bassiouni, një ndër themeluesit e Statutit të Romës dhe të Gjykatës Penale Ndërkombëtare, ndodhet për një vizitë zyrtare në Tiranë në kuadrin e një konferencë ndërkombëtare që organizohet me rastin e 10-vjetorit të ratifikimit të Statutit të Romës nga Shqipëria, e cila është nënshkruese e këtij statuti që prej vitit 1998.
Kryetarja e Kuvendit tha se ndihej e nderuar që kishtë mundësinë të takonte një personalitet të përmasave botërore në fushën e së drejtës ndërkombëtare penale.
“Shqipëria e ka nënshkruar Statutin e Romës që në vitin 1998 dhe në vitin 2003 e ka ratifikuar dhe ka dorëzuar instrumentin përkatës,” tha zonja Jozefina Topalli.
Nga ana e tij, profesor Bassiouni u shpreh se ndihej i lumtur që vizitonte për herë të parë Shqipërinë dhe se do të donte të shihte shumë shpejt gjykatës shqiptarë në Hagë.
Gjatë bisedës së ngrohtë Kryetarja e Kuvendit dhe profesor Bassiouni shkëmbyen mendime në lidhje me çështje të së drejtës ndërkombëtare dhe të gjeopolitikës.
Profesor Bassiouni, gjithashtu bashkëthemelues i Institutit të Lartë të Shkencave Kriminale në Sirakuzë që prej vitit 1972, e ftoi zonjën Jozefina Topalli të vizitojë këtë institut prej të cilit janë diplomuar rreth 296 gjyqtarë nga Shqipëria.
