“Uroj shumë që sot Kombëtarja të bëjë atë që të gjithë shqiptarët dëshirojnë. Sukses çunave kuqezinj dhe trajnerit tonë të mençur!”, ka qënë mesazhi që shkruan kreu i PS-së, në rrjetin social Twitter.
Ekipi ynë kombëtar i Futbollit luan sot në orën 20.30 ndeshjen me Norvegjinë për eliminatoret e Kampionatit Botëror të Futbollit, Brazil 2014.
Kjo është ndeshja më e pritur e historisë së kombëtares shqiptare e që pritet të jetë edhe më e ndjekura pas takimit Shqipëri-Greqi në vitin 2004.
Ndeshja Shqipëri-Norvegji, e vlefshme për kualifikueset e Kampionati Botëror “Brazil 2014”, është më shumë se elektrizuese pasi të gjithë kanë nisur të besojnë gjithnjë e më shumë për një kualifikim të mundshëm të kombëtares sonë, që drejtohet nga italiani Xhani De Biazi, në Botërorin e Brazilit, që do të ishte jo vetëm një rezultat historik, por, mbi të gjitha, edhe një dalje për herë të parë në finalet e tilla.
Policia e Tiranës do të ndërmarrë një sërë masash për sigurimin e rendit e qetësisë në kryeqytet ditën e sotme kur luhet ndeshja e kombëtares me Norvegjinë, e vlefshme për eliminatoret e Kampionatit Botëror të Futbollit.
Sipas një njoftimi zyrtar bëhet e ditur se policia do të ushtrojë kontroll të imtësishëm ndaj tifozëve gjatë hyrjes në stadium për të parandaluar futjen e sendeve të ndaluara si mjete e sende të forta, fishekzjarrë, shishe të ndryshme, kapsolla, flamuj me shkopinj, parulla me mbishkrime jo të përshtatshme, etj.
Ndërkohë janë parashikuar edhe kufizime në qarkullimin e automjeteve. Kështu njoftohet se do të bllokohen segmentet rrugore që të çojnë për në stadiumin “Qemal Stafa”, duke filluar nga ora 14:00 deri më 24:00, konkretisht rrugët “Dervish Hima”, “Asim Zeneli” dhe “Perlat Rexhepi” si dhe Sheshi “Nënë Tereza” deri tek Presidenca.
