SHBA për herë të parë ka pranuar se do të furnizojë me ndihma ushtarake, në mënyrë direkte opozitën siriane, njofton Shtëpia e Bardhë.
Presidenti Obama mori vendimin pasi administrata e tij arriti në përfundimin se forcat siriane nën sundimin e Bashar al-Asad kanë përdorur armë kimike, tha një zëdhënës.
Ben Rhodes nuk ka dhënë detaje në lidhje me ndihmën ushtarake por ata janë shprehur se kjo ndihmë do të jetë e ndryshme në fushëveprim dhe shkallë krahasuar me ndihmat e para.
SHBA kishte paralajmëruar se çdo përdorim i armëve kimike do të kalojë "vijën e kuqe".
Jim Muir i BBC-së në Bejrut thotë se SHBA ka bërë paralajmërime muaj të tërë edhe më parë.
Duket qartë se presidenti Obama më në fund është bindur nga argumentimet, e Britanisë dhe Francës që kanë thënë se fushëbeteja nuk mund të lejohet të anojë vetëm në një anë dhe konkretisht në anën e regjimit në fuqi siç po ndodh aktualisht, shton ai.
Deklarata e Uashingtonit u mirëprit nga Sekretari i Përgjithshëm i NATO-s Anders Fogh Rasmussen.
"Urgjentisht regjimi i Sirisë duhet të lejojë OKB-në të hetojë të gjitha raportet e përdorimit të armëve kimike," tha ai në faqen e tij zyrtare në Twitter.
Por një zëdhënës i Sekretarit të Përgjithshëm të OKB-së Ban Ki-moon, i tha BBC se ai qëndron kundër "militarizimit të mëtejshëm" të konfliktit në Siri, duke thënë se njerëzit atje kanë më shumë nevojë për paqe se sa armë.
