Në Kosovë përfunduan votimet për pushtetin komunal, të parat në të cilat ishin përfshirë edhe komunat veriore të saj të banuara me shumicë serbe. Rreth gjysma e mbi një milion e 700 votuesve të regjistruar kanë shfrytëzuar të drejtën e tyre që të zgjedhin kandidatët e mbi 100 subjekteve politike për të drejtuar 38 komuna të vendit.
Autoritetet vendase e ndërkombëtare gjatë tërë ditës së djeshme kanë bërë thirrje për zgjedhje të lira e të drejta duke i cilësuar ato si sprovë shumë të rëndësishme për realizimin e aspiratave të Kosovës për integrim në Bashkimin Evropian.
Por edhe ditën e sotme Komisioni Qendror i Zgjedhjeve nuk i ka publikuar rezultatet paraprake ashtu siç kishte paralajmëruar.
Në një konferencë të mbajtur pas mesnate, kryetarja e KQZ-së Valdete Daka tha se arsyetimi për këtë është se nuk ka përfunduar ende procesi i numërimit në të gjitha komunat, si dhe mungesa totale e të dhënave nga katër komunat në veri të Kosovës.
Sidoqoftë nga vendvotimet e numëruara deri më tani, shumica e komunave të Kosovës do të shkojnë në raundin e dytë i cili pritet të zhvillohet me 1 dhjetor. Për sa i përket përqindjes, rezultatet janë këto. LDK është e para në prishtinë me 44 %, pas saj vjen vetëvendosje me 31.54%.
Për Prishtinën kanë mbetur edhe 20 vendvotime pa u numëruar dhe gjasat që kryeqyteti të shkojë në balotazh janë të mëdha.
Komunat në të cilat pritet të ketë ndërrim pushteti, ose të paktën votat paraprake e thonë këtë, janë Gjakova në të cilën kandidati i AAK-së Pal Lekaj ka më pak vota se Mimoza Kusari LILA e AKR-së. Pastaj është Gjilani ku duket një fitore e thellë e Lidhjes Demokratike të Kosovës duke mundur kështu PDK-në e kryeministrit Thaçi.
LDK-ja me kandidatin Gazmend Muhaxhiri thellon rezultatin edhe në Pejë duke fituar 40.46% të 88 përqind të votave të numëruara. Pas tij vjen kandidati i AAK-së Ali Berisha, njëherësh kryetar për dy mandate i Pejës. Berisha ka fituar vetëm 36%. Balotazhi është i mundur edhe në Pejë. Partia Demokratike e Kosovës ka marrë numrin më të madh të votave në Prizren si dhe në Mitrovicë.
Sa i përket komunave me shumicë serbe në jug të Kosovës, vërehet një ngritje e menjëhershme e listës serbe të cilën e ka përkrahur qeveria e serbisë. Për komunat me shumicë serbe në veri të kosovës përveç që nuk ka asnjë rezultat, mungon edhe përqindja e pjesëmarrjes në votime. KQZ-ja zyrtarisht ka thënë se nuk ka arritur ta sigurojë përqindjen e pjesëmarrjes pasi pas orës 16 për qind për shkak të situatës së sigurisë është ndërprerë komunikimi me Komisionet Komunale Zgjedhore në veri.
