Kryeministri Rama zhvilloi sot në mbrëmje në Tetovë, një takim të ngrohtë me kryetarin e Partisë Demokratike të shqiptarëve të Maqedonisë, z. Menduh Thaçi.
Rama dhe Thaçi folën për zhvillimet në Maqedoni dhe Shqipëri. “Jemi të interesuar për suksesin e Shqipërisë,” - u shpreh z.Thaçi, teksa e konsideroi një nder të priste në takim Kryeministrin Rama.
Nga ana e tij, Kryeministri shprehu gjithashtu, kënaqësinë të ishte sërish në Tetovë dhe se ndjehej mirë sa herë që ndodhej këtu. Për qeverinë e Shqipërisë, - u shpreh Kryeministri - është privilegj të jemi të mikpritur siç na mikpresin miqtë dhe vëllezërit në Tetovë.
Kryeministri Rama inkurajoi dialogun mes partive shqiptare, i cili, siç theksoi Kryeministri, “mund të sjellë pozitivitet për të gjithë.”
Gjatë takimit, Rama dhe Thaçi risollën në vëmendje rolin e kontributin e ish liderit të PDSH-së Arbër Xhaferri, duke e konsideruar z. Xhaferri një kujtim të jashtëzakonshëm jo vetëm për shqiptarët e Maqedonisë, por për shqiptarët në tërësi.
