Ambientalistë, gazetarë dhe dhjetra qytetarë madje dhe fëmijë protestuan para Kryeministrisë kundër shkatërrimit të armëve kimike siriane në vendin tonë.
Me pankarta ku shkruhej 'Kryeministër mos na helmo!' apo 'Shqipëria, destinacion i resurseve turistike, jo i lëndëve e armëve kimike', qytetarët i kërkuan qeverisë dhe politikanëve t'i thonë jo çdo marrëveshjeje të mundshme për demontimin e armëve kimike në Shqipëri.
"Të bëjnë kujdes në atë që duhet, ardhja e armëve kimike. Ne si qytetarë shqiptarë do i themi: O të shporren armët kimike, ose politikanët që i sjellin ato!", tha ambientalisti Sazan Guri.
"Ne kemi mundësinë të vemë logjikën në punë dhe një nga pyetjet me elementare është: Përse armët kimike duhet të asgjësohen në Shqipëri?" tha Mustafa Nano.
Protestuesit u shprehën se do t'i drejtojnë një kërkesë deputetëve të Parlamentit shqiptar për të kërkuar interpelancë me Kryeministrin lidhur me qëndrimin e Qeverisë mbi këtë çështje.
Gjithashtu kërkuan sensibilizimin e të gjithë qytetarëve shqiptarë për t'i thënë jo bashkarisht ardhjes së armëve kimike siriane ndërsa lajmëruan një tjetër protestë ditën e shtunë.
