Tiranë, 12 maj NOA - Ambasada Italiane në Tiranë organizon nga data 13 deri më 21 maj, një javë me takime në qytetet më të rëndësishme të Shqipërisë.
Për të lehtësuar studimin e të rinjve shqiptare në universitet italiane, do të zhvillohen gjatë kësaj jave, takime në Vlorë, Gjirokastër, Korçë, Shkodër, Elbasan, Durrës dhe Tiranë.
Burime zyrtare nga ambasada italiane, thanë sot për agjencinë e lajmeve NOA se këto takime përveçse do të ilustrojnë sistemin universitar italian, kanë për qëllim në mënyrë të veçantë të lehtësojnë procedurat e regjistrimit në Itali për vitin akademik 2009-2010, si në kurset universitare (Diplomë e Nivelit të Parë, Diplomë e Nivelit të Dyte/Specialiteti/Master) ashtu dhe në kurset pas universitare (Master, Doktoratë etj.) duke u mbështetur edhe në udhëzimet e Kancelarive Konsullore Italiane në Shqipëri.
Në Tiranë, ky takim do të zhvillohet më datë 21 maj në orën 11.00 pranë hotel Tirana International.
Ambasada i fton të gjithë të rinjtë shqiptarë, që të marrin pjesë nëse mendojnë t'i përkushtohen formimit të tyre sipas standardeve evropiane.
e.l/NOA
