Tiranë, 16 gusht NOA - Gripi i derrave ka frikësuar jo pak qytetarët shqiptarë të cilët çdo ditë tejmbushin urgjencat e spitalit, sapo konstatojnë ndonjë simptomë që përputhet me ato të virusit A/H1N1.
Të paktën urgjenca e Spitalit "Nënë Tereza" në Tiranë çdo ditë pret me dhjetëra raste të cilët paraqiten për të marrë mjekimet e para pas frikës se mund të jenë prekur nga gripi i derrave.
Ndërkohë që sipas mjekëve të spitalit, çdo ditë merren kampione dhe dërgohen për analiza në laboratorët e Institutit të Shëndetit Publik për të verifikuar rastet.
Sipas mjekëve të spitalit në urgjencë paraqiten edhe raste të lehta me gripin normal por që frika e gripit të derrit ka krijuar panik te qytetarët të cilët nëse më parë neglizhonin gripin dhe e kalonin atë në gjendje shtëpie tashmë "vrapojë' drejt urgjencës të alarmuar se mund të jenë infektuar nga virusi A/H1N1.
Deri më tani në Shqipëri numërohen 12 raste të infektuar nga gripi i derrit dhe më shumë se 13 raste të dyshuara analizat e të cilëve janë në pritje.
k.k/NOA
