Porto Prince, 15 janar, NOA - Avionët e ndihmave kanë tejmbushur aeroportin kryesor të Haitit me dërgesat e para nga vendet e botës për vendin që u godit para dy ditësh nga një tërmet fatal.
Sekretari i Përgjithshëm i OKB, Ban Ki Moon tha se nevojat imediate të haitianëve janë furnizimet me ilaçe, ushqime, ujë, tenda si dhe pajisje të kërkimit, e pikërisht të tilla kanë nisur të dërgohen drejt këtij vendi.
Ndërkaq, edhe gati dy ditë pas tërmetit shkatërrimtar në Haiti gjendja është kaotike dhe e gjithë përmasa e katastrofës është akoma e paqartë.
Ndërsa vlerësimet e para flasin për gati 100 mijë viktima, rrugëve të Haitit numërohen ende dhjetëra kufoma.
Për të plagosurit e panumërt nuk ka ndihmë mjekësore, ndërsa uji i pijshëm dhe ushqimet janë të pakta. Meqenëse mungojnë makineritë e duhura, kërkimi i të mbuluarve nga rrënojat ecën shumë ngadalë.
Sipas Kryqit të Kuq, tri milionë vetë kanë nevojë për ndihmë urgjente.
Në garë me kohën ndihmësit përpiqen të arrijnë në zonën e tërmetit përmes Republikës Dominikane fqinje.
n.e/NOA
