Durrës, 9 shkurt, NOA Update - Tre persona kanë dhunuar një 38 vjeçar nga qyteti i Durrësit dhe më pas i kanë vënë flakën automjetit me të cilin udhëtonte. Policia sqaron për agjencisë NOA se ngjarja ka ndodhur mbrëmjen e ditës së djeshme në fshatin Arapaj të rrethit bregdetar.
Personi me inicialet A.P ka qenë në automjetin e tij tip "Benz 200" kur i kanë dalë para tre persona ende të paidentifikuar.
Sipas policisë pas debatit që kanë pasur me drejtuesin e mjetit, të tre personat ende të paidentifikuar, e kanë goditur me sende të forta në trup dhe më pas i kanë shkatërruar automjetin duke i vënë zjarrin.
Policia sqaron se pas denoncimit "menjëherë kanë shkuar shërbime Policie dhe Grupi Hetimor i cili ka kryer veprimet procedurale".
Lidhur me krimin, policia e Durrësit thotë se po punohet për identifikimin dhe kapjen e autorëve dhe sqarimin e rrethanave të ngjarjes.
Ndërsa i dëmtuari pas mjekimit të marrë në spital është larguar për në banesën e tij.
xh.q/NOA
