Tiranë, 24 mars, NOA - Seanca e një jave më parë dhe ngritja e komisionit hetimor, vetëm me votat e mazhoancës, është e mjaftueshme për opozitën që të ndërpres çdo komunikim për gjetjen e dialogut. Në emër të Partisë Socialiste, deputeti Blendi Klosi u shpreh, sot, se vetëm protestat mund ti japin fund krizës politike.
"Në seancën e fundit parlamentare, në një shfaqje të shëmtuar arrogance e papërgjegjshmërie mazhoranca e Sali Berishës dhe Jozefina Topallit hodhi poshtë ofertat për kompromis të Partisë Socialiste dhe vendosi ta thellojë edhe më tej krizën ku është futur tashmë vendi", u shpreh ai.
Klosi u shpreh se kriza e gjithanshme që ka kapur vendin mund të zgjidhet vetëm me anë të protestave për largimin e qeverisë.
"Në këto kushte, në mungesë të një partneri të interesuar në dialog e kompromis, në mungesë të një partneri me minimumin e kulturës demokratike europiane, rruga e vetme që i mbetet opozitës shqiptare për përmbushjen e të drejtës së saj kushtetuese për transparencë, janë protestat", u shpreh deputeti i PS-së, Blendi Klosi.
Krahas krizës politike, Klosi i mëshoi dhe faktit se vendi ndodhet dhe në krizë ekonomike, duke përmendur rritjen e çmimeve dhe shtrenjtimin e jetesës.
Duke renditur këto arsye, ai theksoi se gjithë shqiptarët duhet të bëhen pjesë e protestave.
m.xh/NOA
