Tiranë, 15 prill, NOA - Deklarata e Komisionerit për Zgjerimin, Stefan Fule për transparencën e zgjedhjeve të 28 qershorit është interpretuar nga Partia Socialiste si një mbështetje e hapur për kauzën e saj. Deputeti i PS-së, Ditmir Bushati shprehu sot mirënjohjen e selisë rozë ndaj qëndrimit të komisionerit Fule.
"Partia Socialiste përshëndet inkurajimin që Komisioneri për Zgjerimin Stefan Fule i ka dhënë kërkesës sonë për transparencën e procesit zgjedhor të 28 qershorit 2009, si një nga parimet themelore të një shoqërie demokratike, para, gjatë dhe pas vizitës së tij në Shqipëri", u shpreh Bushati.
Ai shtoi se kërkesa për transparencë është një kërkesë që bazohet, jo vetëm në ligjin dhe kushtetutën shqiptare, por dhe në vlerat e parimet europiane. "Kjo kërkesë e jona nuk synon ndryshimin e rezultatit të zgjedhjeve të kaluara, por vetëm garantimin e procesit të ardhshëm zgjedhor", u shpreh Bushati.
Deputeti i PS-së ka theksuar se selia rozë mbështet procesin e kandidimit të Shqipërisë në Bashkimin Europian. "Ky është një proces që shkon përtej interesave të ngushta partiake dhe rivalitetit politik të ditës", tha Bushati.
Ai rikonfirmoi qëndrimin e PS-së për të dhënë kontributin e saj në atë që Bushati e cilësoi si "ndërtimin e një Shqipërie evropiane".
m.xh/NOA
