Prefekti I Tiranës, Letër Ramës: Të Mos Përdoret Administrata Në Protesta
TIRANË, 14 Maj /ATSH- Gjergji Mima/ - Prefekti i qarkut Tiranë, Keltis Kruja i kërkoi përmes një letre kreut të Bashkisë dhe njëherësh, kryetar i Partisë Socialiste, Edi Rama që të mos detyrojë administratën bashkiake të jetë pjesë e protestave të PS-së, pasi "ky është një veprim thellësisht antiligjor".
"Detyrimi i administratës së institucionit që ju drejtoni të marrë pjesë në protesta, apo dhe në grevën e urisë, është një veprim thellësisht antiligjor. Ju ritërheqim vemendjen mbi veprimet e policisë bashkiake në Tiranë në kundërshtim me ligjin "Për organizimin dhe funksionimin e polisisë bashkiake"
Prefekti Keltis Kruja ka përmendur në letër edhe prezencën e policisë bashkiake në mitingun e PS, në 20 nëntor 2009, si dhe në kongresin e PS-së.
"Administrata e organeve të qeverisjes vendore, përfshi edhe policinë bashkiake, nuk mund të përdoret për qëllime të grupeve apo edhe drejtuesve të ndryshëm, të cilët e përdorin atë duke tejkaluar kompetencat e tyre ligjore", thuhet në letër.
Gjithashtu, në këtë letër prefekti Kruja ripërsërit edhe një herë kërkesën për zhbllokimin e bulevardit "Dëshmorët e Kombit" nga grevistët./n.m/
