Tiranë, 20 maj, NOA - Çdo 20 maj, ditën kombëtare të jetimëve, strukturat përgjegjëse për këtë kategori premtojnë për më shumë shërbime e dashuri ndaj fëmijëve që prindërit biologjikë ua kanë mohuar.
Por çdo vit, kjo shtresë përsërit problemet e saj, kryesisht punësimin dhe strehimin, të cilat ua bëjnë jetën më të varfër. Drejtori i Shërbimit Social Shtetëror Mihal Naço ka pranuar se shteti kujdeset për jetimët vetëm në moshën 0 deri 15 vjeç, ndërsa pas kësaj moshe ata duhet t’ja dalin vetë.
“Ne kemi institucionet tona të përkujdesjes të cilat u ofrojnë shërbime fëmijëve vetëm në moshën 0-15 vjeç. Pas kësaj, ne kemi shërbimin kombëtar të punësimit i cili është përgjegjës për punësimin e kësaj kategorie. Por duhet pranuar se për strehimin e tyre nuk është bërë asgjë dhe faj për këtë ka pushteti vendor. Ai duhet të ketë politika të punësimit të cilat duhet të kenë si prioritet kategorinë e jetimëve”, tha kreu i Shërbimit Social Shtetëror, Mihal Naço.
Ministri i Punës Spiro Ksera ka vizituar fshatin Sos ku janë përqendruar një numër i madh fëmijësh të braktisur nga familjet biologjike.
Ksera ka theksuar se për ti ardhur në ndihmë jetimëve, me projektligjin e ri për shërbimet shoqërore që ende nuk është miratuar në kuvend do të përfitojnë ndihmë ekonomike dhe jetimët pas moshës 15 vjeç.
Kjo ndihmë ekonomike është shumë e vogël rreth 75 mijë lekë të vjetra, e cila nuk u mjafton atyre të plotësojnë nevojat jetike.
m.xh/NOA
