Shkodër, 15 korrik, NOA – Ka rënë më në fund në prangat e policisë autori i vrasjes së 62 vjeçarit Ndoc Prroj Vata në fshatin Kasnec të Malësisë së Dukagjinit, një javë më parë.
Vrasësi është 23 vjeçari Gjokë Çukaj, banor i komunës Pult, ku jetonte edhe viktima e tij, 62 vjeçari Ndoc Prroj Vata.
Policia e Shkodrës, njoftoi se arrestimi i autorit të vrasjes u bë sot në orën 14.15.
23 vjeçari Çukaj ishte shpallur në kërkim nga policia që të nesërmen e ekzekutimit me vdekje nga ana e tij e 62 vjeçarit Ndoc Prroj Vata, mbrëmjen e 7 korrikut, një ngjarje e ndodhur në rën 21.45, në fshatin Kasnec, vetëm pak metra larg shtëpisë së viktimës.
Sipas policisë i arrestuari e kishte ekzekutuar 62 vjeçarin për motive të dobëta duke përdorur si armë krimi një pistoletë.
Policia e Shkodrës bën të ditur se arrestimi i 23 vjeçarit vrasës u mundësua përmes negociatave të policisë me familjarët e autorit, të cilët e bindën atë të vetëdorëzohet, duke dorëzuar si provë të krimit edhe armën me të cilën kreu ekzekutimin e 62 vjeçarit.
Gjokë Çukaj, do të ndiqet tashmë penalisht nga Prokuroria e Shkodrës, për vrasje me dashje dhe armëbajtje pa leje.
mit/NOA