Pakistan - Pesë Të Plagosur Në Vendin E Rrëzimit Të Avionit
ISLAMABAD, 28 korrik /ATSH-AFP/ - Pesë persona të plagosur u gjetën në vendin ku u rrëzua një avion linje i kompanisë pakistaneze "Air Blue" me 152 persona në bord, sot në afërsi të Islamabadit, njoftoi ministri i Brendshm, Rehman Malik për një televizion lokal.
Numri i të mbijetuarve nuk dihet ende. Të paktën pesë trupa janë gjetur në vendin e aksidentit, shtoi një zyrtar qeveritar.
"Pesë të plagosur janë dërguar me helikopter në Islamabad", deklaroi Rehman Malik për Express TV.
"Ekipet e ndihmës arritën në vendngjarje. Ato po kërkojnë në të gjithë zonën. Ata po u vijnë në ndihmë të plagosurve, të mbijetuarve dhe po merren masa për transportin e tyre në spital", shtoi ai.
"Po përpiqemi të kemi informacione për pasagjerët. Kjo është një tragjedi, me të vërtetë një tragjedi e madhe", shtoi ai.
/I.Pu.
