Tiranë, 25 mars 2011, NOA- Në vijim të takimeve të tij Ministri i Shtetit për Drejtësinë në Mbretërinë e Bashkuar, Lordi MC Nally, takoi edhe zëvendëskryeministrin dhe Ministrin e Punëve të Jashtme, Edmond Haxhinasto.
Gjatë bisedës, ministri MC Nally vlerësoi partneritetin me Mbretërinë e Bashkuar si vende anëtare të NATO-s si dhe mbështetjen që qeveria dhe populli shqiptar ka dhënë vazhdimisht në sfidat për sigurinë globale në Afganistan dhe aktualisht në Libi.
Ndërkaq ai vlerësoi më tej edhe potencialet e Shqipërisë për zhvillimin ekonomik dhe siguroi për mbështetjen e vazhdueshme të qeverisë britanike.
Haxhinasto nga ana e tij i shprehu Lordit britanik vlerësimin për mbështetjen e qeverisë së Mbretërisë së Bashkuar në ngritjen dhe konsolidimin e institucioneve demokratike në Shqipëri, veçanërisht në fushën e drejtësisë dhe të sigurisë.
Më tej Haxhinasto, parashtroi edhe njëherë kërkesën për liberalizimin e regjimit të vizave të Shqipërisë me Mbretërinë së Bashkuar, për të cilën ministri MC Nally shprehu mbështetjen dhe vëmendjen maksimale.
a.y/NOA
