Gjirokastër, 29 mars, NOA – Një person është arrestuar në flagrancë nga forcat e policisë së Gjirokastrës, pasi u kap me 5 kilogramë lëndë narkotike të llojit marijuanë.
Ngjarja konfirmohet prej tyre për agjencinë e Lajmeve NOA, duke saktësuar se ato kishin marrë informacion paraprak se në një autobus të linjës Tiranë-Kakavijë, në vendin e quajtur Kordhocë-Gjirokastër, kishte hipur një person i cili kishte një çantë shpine dhe brenda saj mund të kishte lëndë narkotike.
Menjëherë ata kanë bashkëpunuar me postbllokun e policisë i cili është i ngritur në dalje të qytetit Gjirokastër në afërsi të Viroit dhe rreth orës 18.00, kanë bërë ndalimin e autobusit.
Nga kontrolli i ushtruar rezultoi se në fund të tij, ishin disa çanta ku në njërën prej tyre konkretisht në një çantë shpine u konstatuan disa pako të mbështjella me letër natriban me lëndë narkotike.
Po në këtë çantë, u konstatua edhe një qese plasmasi ku në brendësi të saj kishte lëndë narkotike e llojit marijuanë, në formë boçeje.
Menjëherë autobusi, së bashku me dhjetë pasagjerë është shoqëruar në ambjentet e Policisë së Gjirokastrës për veprime të mëtejshme.
Nga hetimet rezultoi se Ermal Çela, 27-vjeç, i lindur në Tepelenë dhe banues në Tiranë, e kishte blerë lëndën narkotike në Lazarat për ta shitur në sasi të vogla më pas në kryeqytet në ambientet universitare dhe pub-e nate.
Ndërsa drejtuesi i autobusit, së bashku me pasagjerët e tjerë u lanë të lirë.
Materialet i kaluan prokurorisë së Gjirokastrës për veprime të mëtejshme, për veprën penale të “Prodhim dhe shitje të narkotikëve”, vepër kjo e parashikuar nga neni 283 i Kodit Penal.
n.e/NOA
