Tiranë, 19 maj 2011, NOA- (Update) Kreu i qeverisë Sali Berisha, duke shprehur qëndrimin e tij për situatën e krijuar ditëve të fundit në vend, u bëri thirrje qytetarëve që të mos ndërmarrin veprime brutale.
Duke iu drejtuar kreut të socialistëve Edi Rama, i bëri thirrje që të ndalë ultimatumet e mos ti ndaj qytetarët në socialistë e demokratë.
“Ftoj qytetarët shqiptar të mos ndërmarrin veprime të verbra kundrejt institucioneve, sepse gjëja më e fundit që mund të realizojnë është të marrin mandate mbi shkrumën e fletëve të votimit. Të rrethosh 7 burra dhe 1 zonjë dhe punonjësit e tjerë të cilët po bëjnë punë në përputhje me ligjin, u them atyre se qeveria dhe shteti është i fuqishëm, i them zotit Rama të heqë dorë nga çdo vendim që mund ti cenojë ata, pasi ata janë shërbëtorët e ligjit dhe shtetit, ka një proces zgjedhor të cilin e kemi pranuar dhe votuar bashkërisht le ta ndjekim dhe ti lëmë mënjanë ultimatumet”, u shpreh Kryeministri Berisha.
Më tej ai vijoi duke i thënë kryesocialistit Rama, se populli në Shqipëri nuk ka vetëm socialistë por ka dhe të tjerë që në votimin e fundit, votuan maxhorancën e tyre.
Në përfundim ai ftoi qytetarët që të mos vihen në shërbim duke mbyllur kutitë apo duke i djegur ato, pasi shtoi kreu i qeverisë me votat merren institucionet përkatëse.
Berisha theksoi gjithashtu se 300 votat e kontestuara mund të ndryshojnë rezultatin, por pavarësisht kësaj, maxhoranca ngelet e vendosur të njohë cilindo fitues.
a.y/NOA
