Tiranë, 10 qershor 2011 NOA- Tre ditë përpara se Kolegji Zgjedhor të japë vendimin për ankimimin e fundit për votimin në Tiranë, kryetari i Partise socialiste Edi Rama tha se të hënën vendoset nëse, sipas tij, vendi po shkon apo jo drejt humnerës.
“Mbetet për tu parë sesi do të reagojnë anëtarët e Kolegjit përballë të vërtetash, të cilat, jo vetëm nuk kanë asnjë hije dyshimi por plotësojnë kuadrin e qartë të këtij vendi”, ka deklaruar kryesocialisti.
Në bashkëbisedimin me gazetarët, Rama tha se “Këmbana e votës demokratike që ra dje në Bruksel bie për veshët e kryeministrit Berisha, për ata që duan të kuptojnë se bota demokratike nuk mund ta gëlltisë këtë gjellë të prishur që është gatuar në guzhinën e pushtetit”.
Duke iu rikthyer vendimarrjes së Kolegjit Zgjedhor Rama nënvizoi se “Kush mendon se mund të fshihet pas një vule gjykate, që legjitimiton një vendim të padrejtë, mund të marrë atë që i takon”.
a.q/NOA
