Malësi e Madhe, 9 gusht 2011, NOA – Zjarri i rënë në një banesë i ka marrë jetën sot para mesditës një vajze të vogël trevjeçare. Ngjarja e rëndë ndodhi në një banesë në fshatin Palvar të Malësisë së madhe.
Vogëlushja ndodhej e vetme në shtëpi në momentin kur flakët përfshinë shtëpinë, bëjnë me dije dëshmitarët nga vendngjarja.
Familjarët e saj duket e kishin lënë vetëm vajzën në shtëpi për të kryer ndonjë punë të rastit.
Të alarmuar pasi kanë parë flakët e dendura të zjarrit që ishin përhapur gjithkund ata kanë tentuar të hyjnë brenda me shpresën se do të mund të shpëtonin vogëlushen.
Por, e kanë gjetur të pajetë brenda në dhomë.
Pranë banesës së vjetër e përpirë nga flakët kanë mbërritur edhe zjarrfikësit, të cilët kanë vënë nën kontroll flakët duke shuar vatrën e zjarrit.
Burime nga policia bëjnë me dije se ende nuk dihen shkaqet e rënies së zjarrit në banesë. Ndërkohë mësohet se familjarët të tronditur po merren në pyetje nga grupi hetimor për zbardhjen e shkaqeve të zjarrit, por edhe të arsyes se pse vogëlushja ndodhej e vetme në shtëpi pikërisht në momentin e rënies së zjarrit.
mit/NOA
