Tiranë, 30 shtator 2011, NOA- Një pikë ku paguheshin faturat e energjisë elektrike ka rënë pre e grabitjes me armë mesditën e sotme. Burime zyrtare nga policia thanë për NOA, se ngjarja në fjalë ka ndodhur në afërsi të Shkollës së Baletit, ku dhe është grabitur një pikë për mbledhjen e faturave të papaguara. Sipas policisë thuhet se kjo qendër është grabitur për herë të tretë, ndërsa ditën e sotme ka qenë një person i armatosur ai që ka kërcënuar punonjësen duke marrë prej aty rreth 1 milionë lekë. Sqarohet se në grabitjen e fundit mbeti edhe një shtetase e plagosur. Ndërkaq uniformat blu mbërritën në vendngjarje dhe po marrin dëshminë e punonjëses dhe dëshmitarëve të rastit me synim identifikimin dhe kapjen e autorit të ngjarjes. a.y/NOA
