Prishtinë, 26 tetor 2011, NOA- Me ftesë të Ministrit të Punëve të Jashtme të Finlandës, Erkki Tuomioja, Ministri i Jashtëm i Kosovës, Enver Hoxhaj , i shoqëruar nga Zëvendësministri i Jashtëm, Ibrahim Gashi, kanë udhëtuar sot për një vizitë zyrtare në Finlandë.
Ministri Hoxhaj dhe Zëvendësministri Gashi, të enjten, do të takohen me Ministrin e Jashtëm të Finlandës, Erkki Tuomioja si dhe me Kryetarin e Parlamentit Finlandez, Eero Heinaluoma.
Ministri Hoxhaj, po ashtu do të takohet me Nënsekretaren e Shtetit finlandez, Anne Sipilainen, e cila është përgjegjëse për bashkëpunimin dhe zhvillim të politikave.
Finlanda e konsideron Kosovën shtetin më të rëndësishëm partner në Ballkanin Perëndimor, në aspektin e proceseve të zhvillimit dhe kooperimit.
Ministri Hoxhaj do të mbajë edhe një ligjëratë në Universitetin e Helsinkit, me titull “Rruga e Kosovës drejt BE-së”.
a.y/NOA
Në foto: Ministri i Punëve të Jashtme të Kosovës, Enver Hoxhaj
