Baku, 29 tetor, NOA – Gazsjellësi Trans Adriatik (TAP) është tubacioni i vetëm që mund të përmbushë dëshirën e Evropës Juglindore për të marrë gazin e Kaspikut në një mënyrë me kosto efektive dhe teknikisht të besueshme. Kështu u shpreh Kjetil Tungland, drejtori menaxhues i TAP-it në një konferencë në Bruksel.
I fokusuar në rritjen potenciale të kërkesës për gaz në rajon, TAP është parë në këtë mënyrë si një nga rrugët e duhura, prej të cilës do të përfitojë edhe Shqipëria.
"Shumë vende të Europës Juglindore janë të etur për të siguruar furnizimet e gazit dhe burime të tjera të mundshme nga deti Kaspik. TAP është tubacioni i vetëm i cili mund ta përmbushë këtë vizion", tha Tungland në hapjen e konferencës. Sipas tij, pasi TAP të realizohet, atëherë lidhjet me tregjet e Evropës Juglindore nëpërmjet tubacionit Adriatik-Jon dhe sistemeve të tjera, mund të zbatohen shumë shpejt. Tubacioni Trans-Adriatik do të transportojë gaz nga rajoni i Kaspikut përmes Greqisë dhe Shqipërisë dhe në detin Adriatik në jug të Italisë, duke kaluar më pas në Evropën Perëndimore.
Projekti ka për qëllim rritjen e sigurisë së furnizimit, si dhe diversifikimin e furnizimeve me gaz për tregjet evropiane. Gjatësia totale e tubacionit është rreth 800 kilometra. Kapaciteti fillestar i tubacionit do të jetë 10 miliard metra kub në vit. Aksionarët TAP janë EGL në Zvicër (42.5%), Statoil i Norvegjisë (42.5%) dhe E.ON e Ruhrgas së Gjermanisë (15%).
Ndërsa gazi i prodhuar në kuadër të fazës së dytë të fushës Shah Deniz së Azerbajxhanit është konsideruar të jetë edhe burimi kryesor për projektin e gazit TAP. Në tetor, TAP së bashku me projektet e tubacioneve të tjera paraqitën një propozim gjithëpërfshirës të transportit të konsorciumit Shah Deniz 2, i cili do të marrë vendimin e saj në rrugën e transportit të preferuar deri në fund të këtij viti. "Lidhja me Evropën Juglindore për furnizimet me gazin e Kaspikut do të diversifikojë burimet energjetike të rajonit dhe do të kontribuojë në krijimin e një tregu të gazit të vërtetë pan-evropian", tha Tungland.
n.e/NOA
