Tiranë, 6 nëntor 2011, NOA- Besimtarët myslimanë me rastin e festës së Kurban Bajramit që në orët e para të mëngjesit janë mbledhur në bulevardin “Dëshmorët e Kombit” ku kanë bërë lutjen e mëngjesit.
Të pranishëm në këtë lutje kanë qenë besimtarë e klerikë të klerit mysliman, së bashku me Kryetarin e Komunitetit Mysliman, Selim Muça që së bashku me qytetarët është falur dhe ka uruar për një festë të mbarë.
Sipas krerëve mysliman festa e Kurban Bajramit është festa e sakrificës,e durimit dhe e varfërisë. Besimtarët të kenë më shumë begati, dashuri dhe harmoni në familje, pasi Kurban Bajrami është edhe festa e mirëkuptimit, faljes dhe bashkimit.
Festa e Kurban Bajramit ka si qëllim të saj frymëzimin e dashurisë, të triumfit të së mirës ndaj së keqes, vetëpastrimin e shpirtit dhe mbetet një simbol i sakrificës. Sipas përfaqësuesve të këtij besimi fetar, bërja e kurbaneve është një prej treguesve të afrimit tek e vërteta.
Kurban Bajrami është një ndër dy festat e besimtarëve myslimanë krahas Fitër Bajramit. Në këtë ditë bëhet kurban për hir të Zotit dhe mishi u dhurohet të varfërve. Në thelb, kjo festë është përkujtim dhe ripërtëritje e aktit të Profetit Ibrahim, të konsideruar “baba i profetëve”, i cili u tregua i gatshëm të sakrifikonte djalin e tij, Ismail, nga një urdhër i Zotit përcjellë në ëndërr.
Agjencia e lajmeve NOA bashkohet me gjithë besimtarët myslimanë dhe iu uron një festë të mbarë.
a.y/NOA
