Vërmicë, 12 nëntor 2011, NOA- Kryeministri Berisha, Kryeministri i Kosovës Hashim Thaçi, Presidentja e Kosovës Atifete Jahjaga bashkohen sot për të inauguruar 38 kilometrat e para të autostradës kosovare Vërmicë- Merdarë.
Autostrada në fjalë ka marrë emrin e ish-Presidentit të Kosovës “Ibrahim Rugova”, dhe sipas projektit do kalojë gjithë vendin, nga Vërmica në kufirin me Shqipërinë dhe deri në Merdarë në kufirin me Serbinë.
Autostrada Vërmicë- Merdarë shënon vazhdimin e Rrugës së Kombit nga Durrësi në Morinë dhe ceremonia e inaugurimit të saj do të bëhet sot në mesditë në afërsi të kufirit me Shqipërinë, në Vërmicë.
Afro një vit më parë nisi puna për ndërtimin e kësaj autostrade, ndërsa sot hyjnë në funksion 38 kilometrat e parë.
Mësohet se Kryeministri Sali Berisha do të jetë i shoqëruar nga Ministri i Transporteve Sokol Olldashi në ceremoninë e inagurimit të autostradës, kilometrat e para të së cilës kanë kapur shifrën 330 milionë euro.
a.y/NOA
