Tiranë, 22 nëntor 2011, NOA – Policia e Tiranës arrestoi një 26-vjeçar nën akuzën se dje i vuri zjarrin nga pakujdesia një dyqani duke shkrumbuar totalisht 20 dyqane të tjera në tregun ushqimor, raporton agjencia e lajmeve NOA.al.
26-vjeçari Hajri Jashar Dragjoshi, lindur në fshatin Vilë Kukës dhe banues në Tiranë dyshohet se dje rreth orës 16.20’, në rrugën “Konferenca e Pezës“, në afërsi të tregut ushqimor, pasi ka ndezur një fishekzjarr në dyqanin e tij, nga pakujdesia flakët janë përhapur me furi duke djegur një pjesë të dyqaneve që tregtonin mallra shumice në tregun ushqimor.
Autori e ka pranuar faktin se ishte duke luajtur me fishekzjarre në dyqanin e tij, duke pranuar se flakët e përhapura ndodhën për shkak të pakujdesisë, duke shkrumbuar edhe dyqanin e tij bashkë me 20 të tjerët.
Policia përmes një deklarate bën me dije se për shuarjen e flakëve dhe lokalizimin e tyre nga magazinat e fishekzjarreve ndihmuan edhe zjarrfikëse të mbërritura nga qyteti i Durrësit, Ministria e Mbrojtjes, si dhe mjete të tjera nga Bashkia e Tiranës.
Paraprakisht nga ekspertët xhenierë në vendngjarje u dyshua se shkak i këtij zjarri të fuqishëm kishte qenë një shkëndije elektrike.
Blutë sqarojnë se rreth orës 19.00’ u mundësua shuarja përfundimisht e flakëve të magazinës dhe dyqaneve përreth, ku fatmirësisht nuk pati të lënduar në njerëz për shkak se edhe banorët e zonës u evakuuan.
mit/NOA
