Tiranë, 30 nëntor 2011, NOA – Trashëgimtari i Fronit Mbretëror shqiptar, i biri i mbretit Ahmet Zog dhe mbretëreshës Geraldinë, Leka I ndërroi jetë në orët e mëngjesit të së mërkurës, në moshën 72-vjeçare, raporton agjencia e lajmeve NOA.al.
N.M.T. Leka I ishte shtruar prej afro dhjetë ditësh në Reanimacionin e Spitalit të Neurokirurgjisë, pas një përkeqësimi të shëndetit të tij në zemër dhe në rrugët e frymëmarrjes.
Sipas mjekut të njohur neurokirurgut Mentor Petrela, trashëgimtari i fronit Leka I vuante nga probleme multisistemike.
Pas disa përmirësimesh të vogla të herëpashershme gjatë ditëve të shtrimit në spital, i biri i mbretit Zog ka mbyllur sytë përjetë.
N.M.T. Leka I u lind më 5 prill 1939, pra dy ditë përpara pushtimit të Shqipërisë nga Italia fashiste, që u bë pikënisja e shtegtimit politik jashtë Atdheut të Familjes Mbretërore shqiptare.
mit/NOA
Në foto: Trashëgimtari i Fronit Mbretëror Shqiptar, Leka Zog I
