Tiranë, 2 dhjetor 2011, NOA- Një operacion i policisë së Tiranës i koduar “Redoni” bëri sekuestrimin e një punishteje me pije alkoolike e paliçensuar dhe që prodhonte pije të rrezikshme për shëndetin.
Siç informon agjencia e lajmeve NOA.al, si rrjedhojë e këtij operacioni u prangos Fatmir Haka, 54 vjeç, banues në Tiranë, i cili u bllokua në afërsi të urës Vasil Shanto, me një sasi pijesh alkoolike.
Burime zyrtare nga policia bëjnë me dije se, nga kontrolli i ushtruar në banesën e tij u sekuestrua një punishte me aparatura dhe një sasi e konsiderueshme pijesh alkoolike si dhe esenca të ndryshme që përdoreshin për prodhimin e pijeve të ndryshme alkoolike kryesisht konjak.
Mësohet se kjo punishte ndodhej në rrugën “Robert Zhvarts" në kryeqytet, ku sasia e pijeve alkoolike u sekuestrua në cilësinë e provës të rrezikshme për jetën dhe shëndetin e konsumatorit.
Sipas policisë thuhet se ky aktivitet, ushtrohej në mënyrë të paliçensuar dhe të pa regjistruar në organet tatimore, duke ju shmangur kështu detyrimeve tatimore.
a.y/NOA
