Korçë, 22 dhjetor 2011, NOA- Babai mostër i cili shiste si prostituta dy vajzat e tij të mitura 8 dhe 10 vjeç është vënë përballë dënimit nga Gjykata e Korçës.
Siç raporton agjencia e lajmeve NOA.al, ndaj Pëllumb Mullait u dha pretenca me 15 vite burg, por dënimit nuk i shpëtuan as 4 klientët e të miturave miq të Mullait.
Prokurori ka kërkuar 15 vite burg edhe për dy klientët Andrea Nametin dhe Skënder Kollanin ndërsa ka kërkuar 10 vite burg për dy klientët e tjerë Nevruz Kollanin dhe Nderim Koçin.
Prokuroria e akuzon Mullain për shfrytëzim prostitucioni të dy të miturave ndërsa katër personat e tjerë për marrëdhënie seksuale me të mitura kundrejt pagesës.
Babai i dy vajzave minorene që denoncuan në polici se u shfrytëzuan për prostitucion në moshën 8 dhe 10-vjeçare, nuk e ka pranuar akuzën që rëndon ndaj tij.
Pëllumb Mullai ka thënë për policinë se, akuzat janë mashtrime dhe sajesa të të bijave edhe personat e tjerë të arrestuar për pedofili.
Por sipas Prokurorisë së Korçës, ka prova të mjaftueshme që vërtetojnë akuzat që rëndojnë jo vetëm ndaj babit mostër, por edhe ndaj katër klientëve.
Nga ana e saj, policia e Korçës ka theksuar më herët se ka të dokumentuara provat që vërtetojnë se Pëllumb Mullai ka shfrytëzuar për qëllime fitimi me anë të prostitucionit dy vajzat e tij të mitura gjatë periudhës kohore 2004-2006, ndërsa aktualisht 15 dhe 17 vjeç.
Burime të policisë së Korçës thanë se kanë pasur prej kohësh sinjalizime se babai i dy vajzave i shfrytëzonte ato duke i vënë në “shërbim” të personave të njohur, të cilëve u merrte lekë në këmbim të shërbimit që merrnin nga vajzat.
a.y/NOA
Në foto: Pëllumb Mullai
