Berlin, 30 dhjetor 2011, NOA - Luan Krasniqi boksieri më i njohur shqiptar, i ka dhënë fund karrierës së tij në boksin profesionist.
40-vjeçari Krasniqi, i lindur në Junik të Kosovës, por që ka bërë karrierë nën flamurin gjerman, e bëri të ditur zyrtarisht largimin e tij nga boksi, nëpërmjet një letre të publikuar në faqen e tij të internetit, raporton agjencia e lajmeve NOA.al.
Boksieri i madh falenderon të gjithë ata që e ndihmuan të mbërrinte në sukseset e madha gjatë karrierës së tij në boksin profesionist.
Luan Krasniqi falenderon në mënyrë të veçantë edhe tifozët për përkrahjen që i kanë dhënë, shkruan Kosovapress.
Gjatë karrierës së tij, Luan Krasniqi ka zhvilluar 35 ndeshje, 30-të nga të cilat i ka fituar, një barazim dhe katër humbje.
Luan Krasniqi për disa vite radhazi ishte kampion i Evropës, ndërsa arriti të renditet edhe në vendin e dytë në listën e më të mirëve të botës për peshat e rënda në versionin WBO.
mit/NOA
