Tiranë, 19 maj 2011, NOA – Pas disa orësh numërimi të votave të kontestuara për kryetar të Bashkisë së Tiranës, Komisioni Qendror i Zgjedhjeve ka kërkuar më shumë se një orë pushim për ta rinisur mbledhjen e radhës në orën 17.00. Deri më tani janë numëruar fletët e kontestuara në plot 33 kuti.
Kandidati i koalicionit “Aleanca për Qytetarin” ka marrë deri më tani 57 vota më shumë nga votat e kontestuara, ndërsa kandidati i koalicionit “Aleanca për të Ardhmen” 22 vota më tepër po nga këto fletë.
Këto vota shtesë me urdhër të kreut të KQZ-së Arben Ristani i janë shtuar sakaq tabelave përmbyllëse të rezultatit, duke e ndryshuar atë paraprakisht.
Sipas këtyre votave tashmë avantazhin në Tiranë e udhëheq kandidati demokrat Lulzim Basha, me 35 vota më shumë se rivali i tij, Edi Rama, që pret të marrë mandatin e katërt për bashkinë e Tiranës.
KQZ ka numëruar sot kuti të njësisë bashkiake nr. 11 e vendosur në KZAZ-në 55, ndërsa për mbledhjen e pasdites kanë mbetur për t’u numëruar edhe 31 kuti, që i përkasin KZAZ-së 46, KZAZ-së 53 dhe KZAZ-së 54.
KQZ ka vijuar numërimin e votave nën tensionin e protestuesve, ku qindra militantë socialistë të drejtuar nga deputetët e PS-së kishin mësyrë në sheshin para KQZ-së në përpjekje për të ndalur ndryshimin e rezultatit për Tiranën në tavolinë.
Protestat e simpatizantëve të PS-së kanë vijuar njëherësh edhe në disa qytete të vendit, ku janë bllokuar disa akse rrugore kyçe që lidhin Tiranën me qytetet e tjera.
mit/NOA
