Përmbysja e rezultatit të atij numërimi në tavolinën e Komisionit Qendror të
Vjedhjeve, ku edhe vetë maskarada është e arnuar si mos më keq deri edhe me
fletë votimi të sajuara me ngut e të zhytura në kuti jo nga zgjedhësit po
nga vjedhësit nuk mund të kthehet në një fakt të kryer pa asgjësuar më parë
opozitën shqiptare....
Shprehim keqardhje të madhe për anulimin e vizitës në Shqipëri të
Presidentit të Komisionit Europian Hose Manuel Barroso.
Ky është një sinjal aspak ogurmirë për Shqipërinë, por edhe një reagim
kuptimplotë i Bashkimit Europian në kushtet kur vendi ynë po përjeton
dhimbjet e dështimit dramatik të procesit zgjedhor të 8 majit.
Komisioni Qendror i Vjedhjeve, nën dhunën e patolerueshme antiligjore të
Saliut, po vazhdon të konsumojë në televizor një krim me pasoja të
pallogaritshme për demokracinë, shtetin e të drejtës dhe vetë stabilitetin e
këtij vendi.
Opozita Shqiptare, Partia Socialiste si zemra e saj, nuk do të pushojë së
kërkuari rrugëdaljen demokratike, ligjore, politike nga ky qorrsokak ku sytë
e verbuar të kryeministrit dhe epshi shtazarak i oborrit të tij të
interesave të paligjshme politike e financiare, po e ndryjnë orë e çast
Shqipërinë.
Ne i kemi fituar zgjedhjet në Tiranë, e panë miliona sy dhe e dëgjuan
miliona veshë numërimin në kohë reale të çdo vote.
Përmbysja e rezultatit të atij numërimi në tavolinën e Komisionit Qendror të
Vjedhjeve, ku edhe vetë maskarada është e arnuar si mos më keq deri edhe me
fletë votimi të sajuara me ngut e të zhytura në kuti jo nga zgjedhësit po
nga vjedhësit nuk mund të kthehet në një fakt të kryer pa asgjësuar më parë
opozitën shqiptare.
Saliu duhet ta dijë shumë mirë se për të qëndruar në atë
vend duhet t’i lëshojë rrugë Kushtetutës, ligjit, të vërtetës së 8 majit në
Tiranë dhe çdo llogari e bërë mbi bazën e përdorimit të forcës mbi opozitën
për të imponuar një rezultat të paligjshëm, është llogari kryekëput e
gabuar.
Thërrasim përsëri sot në ndihmë komunitetin e miqve dhe partnerëve të
pazëvendësueshëm të popullit shqiptar, Shtetet e Bashkuara, Bashkimin
Europian, OSBE, dhe çdo mik e partner tjetër që të mos i lënë vetëm
Shqipërinë e shqiptarët në këto orë dramatike.
Ne jemi gati të kontribuojmë me gjithçka mundemi për kthimin e kësaj faqeje
të vjetër që po zymtohet orë e çast dhe nxjerrjen e vendit nga ky udhëkryq
mes humnerës tëposhtë e majës së lartë të lirive e të drejtave të garantuara
për çdo qytetarë, duke filluar nga liria dhe e drejta themelore e votës.
Asnjëherë në një konflikt mes forcave politike në Shqipëri s’ka qenë më e
qartë se sot se kush është dhunuesi e kush është i dhunuari dhe ne duam të
besojmë megjithë zemër se komuniteti ndërkombëtar do të ndërhyjë në
mbrojtje të lirisë, demokracisë, stabilitetit të këtij vendi, duke mos
lejuar që të konsumohet deri në fund një maskaradë me kosto marramendëse për
të ardhmen e afërt të Shqipërisë.
Apeli yni i drejtohet edhe Presidentit të Republikës si garant i Kushtetutës
dhe Kryetar i Këshillit të Lartë të Drejtësisë, që të veprojë në mbrojtje të
unitetit kombëtar e stabilitetit demokratik të vendit, duke marrë në mbrojte
institucionin e votës së lirë si themelin e unitetit e të stabilitetit.
Opozita shqiptare do të kërkojë në orët në vijim, përmes një kallëzimi penal
për shpërdorim detyre dhe falsifikim të rezultateve zgjedhore nga ana e
katër anëtarëve të Komisionit Qendror të Zgjedhjeve, ndërhyrjen e
prokurorisë për të administruar me shpejtësi të gjitha provat e krimit
elektoral që po konsumohet në tavolinën e atij komisioni dhe filluar
menjëherë hetimin e kësaj vepre antikombëtare, antikushtetuese, antiligjore
me qëllime të errëta politike.
Çdo shqiptar që beson sot tek e ardhmja europiane e këtij vendi, çdo
qytetarë që beson tek e drejta e shkelur sot përdhunisht, çdo njeri i
zakonshëm që sot beson tek mundësia e një jete më të mirë në këtë vend,
duhet ta dijë se ne nuk dorëzohemi, ne nuk tërhiqemi, ne nuk tutemi përpara
diktaturës së faktit të kryer në dëm të së ardhmes e në shkelje të së
drejtës.
Ne jemi në këmbë dhe s’ka diktat e dhunë shtetërore që na gjunjëzon derisa
të kemi frymë.
*Deklaratë për Shtyp e Kryetarit të PArtisë Socialiste Edi Rama
