Presidenti i Komisionit Evroian, Hoze Manuel Baroso, shprehu përkushtimin e BE-së për perspektivën evropiane të Kosovës.
Ai tha se vizita e tij në Kosovë është një sinjal për këtë përkushtim.
Megjithatë Baroso theksoi se “i takon Kosovës dhe popullit të saj të zbatojë reformat e nevojshme, përfshirë luftën kundër korrupsionit dhe krimit të organizuar”, lidhur me integrimin në BE.
Këto komente Baroso i bëri në Prishtinë, pas takimit me kryeministrin e Kosovës, Hashim Thaçi. Ai foli edhe për dialogun Prishtinë – Beograd, duke e cilësuar atë si një proces pozitiv.
Nga ana e tij, Thaçi tha se Kosova do të jetë e përkushtuar për zbatimin e reformave të kërkuara nga BE-ja dhe shprehu bindjen se raporti i ardhshëm i progresit, i cili hartohet nga Komisioni Evropian, do të jetë më pozitiv se ai i vitit të kaluar.
Baroso, i shoqëruar edhe nga Komisioneri për Zgjerim i Bashkimit Evropian, Shtefan Fyle, është takuar sot edhe me presidenten e Kosovës, Atifete Jahjaga, raporton RFE.
