Shkodër, 21 maj 2011, NOA – Pas një konflikti të çastit për motive të dobëta ka mbetur i plagosur me armë zjarri një 34-vjeçar në komunën Rrethina të Shkodrës.
I plagosuri është 34-vjeçari Edmond Sakica nga fshati Shtoj i Ri.
Lajmin e bëri publik policia e Shkodrës, e cila tha se ngjarja ndodhi sot rreth orës 14.45 në fshatin Shtoj i Ri, të komunës Rrethina pikërisht pranë vendit të quajtur Kompleksi i Zmijanve.
Sipas policisë Sakica u plagos në këmbë, me armë zjarri tip pistoletë.
I dëmtuari ndodhet aktualisht në spitalin rajonal të Shkodrës jashtë rrezikut për jetën.
Policia pas hetimeve paraprake informoi se Edmond Sakica u plagos pas një konflikti për motive të dobëta nga 44-vjeçari Hilmi Manaj, banues në fshatin Grizhë në komunën Gruemirë, të rrethit të Malësisë së Madhe.
Autori u shoqërua në komisariatin e policisë së Shkodrës, për sqarimin e plotë
të rrethanave të ngjarjes, ndërkohë që si i plagosuri edhe autori i plagosjes do të ndiqen penalisht.
mit/NOA
