Tiranë, 23 maj 2011, NOA - Kryetari i Lëvizjes Socialiste për Integrim Ilir Meta deklaroi sot se rezultati i zgjedhjeve vendore të 8 majit për LSI-në është shumë më i mirë se ai i zgjedhjeve të përgjithshme të vitit 2009, porse nuk u realizuan objektivat e kërkuara.
Pas takimit me krerët e LSI-së në rrethe, shefi i partisë së dytë të koalicionit të mazhorancës qeverisëse theksoi se LSI ka marrë 45 mijë vota më shumë se në zgjedhjet e shkuara.
Ai i vlerësoi zgjedhjet e 8 majit si zgjedhje me rezultatin më pozitiv për LSI-në.
Meta nënvizoi se ky rezultat është pikënisja për zgjedhjet e përgjithshme parlamentare të vitit 2013, që sipas Metës do të shënojnë më shumë rezultat për këtë forcë politike.
Megjithatë referuar edhe faktit se kandidatët e LSI-së nuk fituan në disa bashki kryesore në vend, si ajo e Elbasanit, apo e Lushnjes dhe Beratit, por edhe në minibashkinë nr. 5 në Tiranë, lideri i LSI-së apeloi se në zgjedhjet e 8 majit nuk u plotësuan objektivat e kërkuara nga LSI.
Duke iu referuar garës për minibashkinë nr. 5 në Tiranë, ku Erisa Xhixho e LSI-së humbi ndaj Jeta Seitaj, Ilir Meta nënvizoi se në Tiranë LSI arriti rezultatin më të lartë të arritur ndonjëherë, por pa realizuar objektivat e kërkuara.
Ai paralajmëroi mbledhjen e afërt të Këshillit kombëtar të LSI-së, ku do të vendoset për platformën e rezultateve, që sipas tij duhet t’i kushtohet qytetarëve.
mit/NOA
