Tiranë, 26 maj 2011, NOA- Ministri i Brendshëm Bujar Nishani priti në një takim Ministrin e Administrimit të Pushtetit Lokal të Kosovës Sllobodan Petroviç, në kuadër të vizitës së tij dy ditore në Shqipëri.
Gjatë takimit ministri Nishani e njohu Petroviç mbi rëndësinë që i është kushtuar në Shqipëri zbatimit në praktikë të parimeve të Kartës Europiane të Autonomisë Vendore, delegimin e sa më shumë kompetencave nga pushteti qendror drejt pushtetit vendor, shumëfishimin e grantit dhe financimeve të tjera nga qeveria për njësitë e qeverisjes vendore.
Sakaq ai shtoi edhe dhënien e mundësisë për kredimarrje të drejtpërdrejtë nga njësitë vendore dhe transferimin e pronave publike drejt pushtetit vendor.
Një pikë tjetër ku u ndal gjatë bisedës ishin edhe zgjedhjet e 8 majit, ku Nishani informoi se qeveria shqiptare dhe Ministria e Brendshme përmbushën të gjitha detyrat e përcaktuara në ligj për organizimin dhe mbarëvajtjen e zgjedhjeve për pushtetin vendor që u zhvilluan më 8 maj 2011, duke veçuar dokumentet e identitetit të standardeve më të larta ndërkombëtare, si dhe listat e sakta të zgjedhësve që buruan nga Regjistri Kombëtar Elektronik i Gjendjes Civile.
Nishani dhe Petroviç shprehën besimin se të gjitha vendet e rajonit janë në rrugë të mbarë në axhendën e përbashkët për integrimin në Bashkimin Europian.
Nga ana e tij, ministri Petroviç i drejtoi Ministrit Nishani një ftesë zyrtare për të vizituar Kosovën.
Më tej, ministrat Nishani dhe Petroviç u angazhuan në takim për të nxitur binjakëzimet mes njësive të pushtetit vendor në Shqipëri dhe Kosovë si dhe shprehën angazhimin e plotë për të nxitur bashkëpunimin mes strukturave dhe specialistëve të pushtetit vendor për shkëmbimin dhe implementimin e politikave dhe praktikave më të mira për qeverisjen vendore në Shqipëri dhe Kosovë.
a.y/NOA
