Tiranë, 20 qershor 2011, NOA – Pas deklaratës së ministrit Genc Pollo për të mos u tërhequr nga projekti për regjistrimin e popullsisë dhe vetëdeklarimi etnik e fetar ka reaguar “Aleanca Kuq e Zi”, e cila kundërshton vendimin e qeverisë komunikuar nga ministri Pollo si tejet zhgënjyes dhe se bie ndesh me parimet dhe standardet demokratike.
“Vendimi zyrtar i komunikuar nga Ministri Genc Pollo është thellësisht
zhgënjyes, në mungesë të parimeve dhe standardeve demokratike si dhe
prepotencë e hapur ndaj opinionit publik, i cili në mënyrë masive është
përfshirë në lëvizjen kundër rregjistrimit”, thuhet në deklaratën për shtyp të shpërndarë nga Aleanca Kuq e Zi.
Kjo aleancë ka ndjekur me shqetësim të thellë deklaratën zyrtare të
ministrit Pollo duke theksuar se ky vendim vjen kur elita e intelektualëve shqiptarë kanë nënshkruar peticionin kundër regjistrimit etnik dhe fetar dhe kur të gjitha komunitetet fetare janë shprehur kundër këtij lloj rregjistrimi si një shkak që mund të prishë bashkëjetesën fetare.
Sipas Aleancës Kuq e Zi ky lloj rregjistrimi mbi baza vetëdeklarimi jashtë kritereve
objektive nuk aplikohet nga vendet anëtare të Bashkimit Evropian përfshirë dhe
Greqinë.
Aleanca Kuq e Zi parashtron argumentet pse rregjistrimi popullsisë mbi bazën e vetëdeklarimit etnik dhe fetar duhet të tërhiqet duke bërë me dije se “ky regjistrim ka dështuar pjesërisht kudo ku jetojnë
Shqiptarët në Kosovë, Mal të Zi, Maqedoni dhe ku akademikët më në zë
shqiptarë nga të gjithë trevat shqiptare janë shprehur dhe kanë argumentuar
pasojat dhe rreziqet për identitetin tonë kombëtar; kur të gjithë shqiptarët që jetojnë në emigracion dhe janë pjesë e diasporës janë të shqetësuar për këtë proces; kur Gjykata Kushtetuese ka në gjykim kërkesat e gjykatës
Sarandë, Përmet dhe Shkodër për shfuqizimin e ligjit “Për gjendjen civile”
mbi dispozitat që vijnë në kundërshtim të hapur me Kushtetutën dhe kur
pritet vendimi i kësaj gjykate; kur në publik është hapur një debat i gjerë juridik, historik
dhe politik mes aktorëve më të njohur të tre pushteteve dhe institucioneve
të tjera të pavarura”, thuhet në deklaratë.
Aleanca Kuq e Zi thekson se populli po i drejtohet Kuvendit të Shqipërisë
për të amenduar dispozitat e ligjit për rregjistrimin e popullsisë.
Në fund të deklaratës Aleanca Kuq e Zi e drejtuar nga Kreshnik Spahiu njëherësh nënkryetar i Këshillit të Lartë të Drejtësisë, deklaron se do të paraqesë të mërkurën pranë Kuvendit peticionin kundër rregjistrimit të popullsisë përmes vetëdeklarimit të fesë dhe etnisë i nënshkruar nga dhjetra mijë shqiptarë.
“Në këto kushte të detyruar nga kjo trysni dhe presion burokratik Aleanca Kuq
e Zi është e detyruar të paraqesë pasnesër në ora 10.00 në zyrat e Kuvendit
të Shqipërisë, peticionin e dhjetra mijra qytetarëve shqiptarë si mënyra e
vetme demokratike për të frenuar një proces i cili është imponuar nga jashtë
dhe ka rrezik të destabilizojë të ardhmen politike të Shqipërisë”, nënvizon Aleanca Kuq e Zi duke theksuar se ky nuk do të jetë hapi i vetëm për ndalimin e këtij projekti që nuk i shërben sipas saj të ardhmes politike të Shqipërisë.
mit/NOA
