Tiranë, 28 qershor 2011 NOA- Ministri për Inovacionin dhe TIK Genc Pollo ka sqaruar për gazetrët veçoritë e vendimit të miratuar në mesditë nga kuvendi lidhur me regjistrimin e popullsisë. Pollo pohoi se “Projektligji, që u përfshi sot, në kalendarin e Kuvendit, është një përmirësim i ligjit të vitit 2000 për Censusin. Sipas ligjit të vitit 2000, kushtëzohet që të dhënat e Censusit, pra të dhënat që vilen me anketim, të hidhen në Regjistrin Civil dhe të marrin forcë ligjore. Sot kjo gjë, jo vetëm është e tejkaluar, por është edhe e dëmshme nëse do të zbatohet”.
Sipas anëtarit të kabinetit qeveritar, lidhja Census–Regjistër abrogohet me projektligjin e sotëm. Të dhënat e vjelura nga censusi do të kenë vetëm kuptim statistikor dhe nuk mund të lidhen me identitetin e personit apo të banesës.
“Projektligji parashikon edhe një gjobë prej 1 milionë lekë për këdo që shkel normat ligjore apo për cilindo që bën deklaratë të rremë në procesin e censusit.
Spekulimet që kanë bërë personazhe të ndryshëm, me natyrën dhe përmbajtjen e këtij projektligji janë thjesht të pavërteta”, ka përfunduar sqarimin e tij ministri Pollo, nismëtar për të kaluar pr/ligjin me procedurë të përshpejtuar në parlament.
a.q/NOA
