Tiranë, 30 qershor 2011, NOA – Partia Socialiste sapo dorëzoi në Kolegjin Zgjedhor ankesë-padinë e re ku kërkon pavlefshmëri të zgjedhjeve në Tiranë për 284 qendra votimi dhe ripërsëritjen e tyre, si dhe hedhjen poshtë të vendimit të KQZ-së për shpalljen e Lulzim Bashës fitues me 93 vota.
Në këtë kërkesë-padi prej 61 faqesh sipas sekretarit ligjor socialist Fatmir Xhafaj, janë përfshirë të gjitha provat e mbledhura që faktojnë cënimin e integritetit të procesit zgjedhor, të kutive të votimit, si dhe të gjitha CD-të e regjistruara me këto prova.
Socialistët e argumentuan kërkesën për pavlefshmëri të zgjedhjeve me kutitë e dëmtuara të votimit, fletët e gjetura tepër numrit të votuesve në disa prej kutive, apo në disa syresh fletët mangut të gjetura gjatë hapjes së kutive në KQZ, si dhe mungesën e kodit të sigurisë që mbyll pjesën ku futet fleta e votimit.
Tashmë pritet që Kolegji Zgjedhor të shqyrtojë këtë kërkesë sipas afatit kushtetues.
Në rast se Kolegji Zgjedhor rrëzon ankimimin e PS-së atëherë kandidati demokrat Lulzim Basha i shpallur fitues me 93 vota më shumë se rivali socialist Edi Rama pritet të mandatohet në krye të bashkisë së Tiranës për katër vitet e ardhshme.
Por, në rast se Kolegji Zgjedhor pranon ankesën e PS-së për pavlefshmëri të zgjedhjeve në 284 QV, atëherë Tirana pritet t’i rikthehet betejës për kryetarin e bashkisë, në muajin shtator.
mit/NOA
