Tiranë, 15 korrik 2011 NOA – Ka gjetur vdekjen si rezultat i plumbave të një arme tip pistoletë me silenciator, Aleksandër Koliqi i njohur dhe me emrin Aleksandër Gremi.
I ndjeri, humbi jetën pak pasi u qëllua me armë, ndërsa ishte duke u futur në shtëpi, me qese në duar pasi kishin blerë ushqime në dyqanin afër vendbanimit.
Gjithçka ndodhi mbrëmjen e sotme tek rrethrrotullimi i Tiranës së Re, jo larg shkollës së mesme të përgjithshme “Petro Nini Luarasi”, raportoi bashkëpunëtori i agjencisë NOA.
Policia e shumtë në vendngjarje, ka nisur hetimet për të zbardhur rrethanat e vrasjes së 35-vjeçarit dhe për të mundësuar kapjen e autorit i cili është zhdukur në drejtim të panjohur.
***
Më 23 maj 2006, Aleksandër Koliqi ishte arrestuar pasi strukturat e Policisë së Shtetit organizuan operacionin e Koduar “Poter-Al” për ndalimin e 7 shtetasve ndaj të cilëve Prokuroria për Krime të Rënda kishte lëshuar Urdhrat e Ndalimit për trafik të lëndëve narkotike në kuadër të grupit të strukturuar kriminal.
Urdhërat e ndalimit ndaj këtyre shtetasve ishin nxjerrë bazuar në materialet e ardhura nga autoritet gjyqësore italiane, si dhe në hetimet intensive të kryera për një periudhë disa mujore nga Prokuroria Për Krime të Rënda në bashkëpunim me Drejtorinë e Luftës kundër krimit të Organizuar dhe mbrojtjes së dëshmitarëve në Ministrinë e Brendshme.
Operacioni për ekzekutimin e urdhrave të ndalimit nga strukturat e Policisë së Shtetit ka filluar rreth mesnatës së 22 majit 2006 dhe ka vazhduar deri në orët e para të mëngjesit të ditës së sotme në qytetet Tiranë, Durrës, Elbasan dhe Vlorë.
Në këtë operacion morën pjesë 32 forca policore të drejtuara nga Drejtoria e Luftës kundër Krimit të Organizuar e Mbrojtjes së Dëshmitarëve pranë Ministrisë së Brendshme.
Si rezultat i këtij operacioni u bë i mundur kapja dhe ndalimi i shtetasve:
1. Ilir Kociaj, lindur dhe banues në qytetin e Elbasanit.
2. Geront Tola alias Geront Dedja, lindur në qytetin e Librazhdit dhe banues në Elbasan.
3. Zamir Vadardha, lindur në Shijak dhe banues në qytetin e Elbasanit, (ndalimi i tij është bërë në qytetin e Durrësit)
4. Bledi Balliu, lindur në qytetin e Fierit dhe banues në qytetin e Tiranës.
5. Aleksandër Kolici alias Aleksandër Gremi, lindur në qytetin e Fierit dhe banues në qytetin e Tiranës.
6. Leonard Cobaj, lindur dha banues në qytetin e Vlorës.
7. Ervin Tavanxhi, lindur në qytetin e Elbasanit dhe banues në qytetin e Tiranës.
e.t/NOA
