Korçë, 19 Korrik 2011 NOA/ Alba Filipi – Zjarri i fuqishëm i cili shpërtheu para disa minutash në qytetin e Korçës, solli për pasojë vënien nën flakë të katër apartamenteve të një pallati ndërtim ekzistues.
Korrespondentja e agjencisë NOA raporton se zjarri në katin e tretë të një pallati që ndodhet në lagjen nr 6 të qytetit juglindor, u shtri me shpejtësi nga banesa ku pati fillesën tek tre të tjerat e të njëjtit kat.
Në vendngjarje shkuan disa forca të ekipeve të shpëtimit dhe repartit zjarrfikës, si dhe forca të shumta policore.
Aktualisht ka përfunduar evakuimi i plotë i banorëve të pallatit, raporton korrespondentja e NOA nga vendi i ngjarjes.
Katër familjet që mbetën të pastreha, i përkisnin komunitetit rom. Godina trekatëshe ku ata jetonin ishte në gjendje të degraduar. Banorët e dëmtuar thonë se kanë pësuar dëme të konsiderueshme materiale.
Policia ende nuk po del me një pistë hetimi për shkaqet që sollën zjarrin e sotëm.
a.f/e.t/NOA
