Tiranë, 16 gusht 2011, NOA – Policia e Shtetit flet për aksidentin e rëndë të regjistruar mbrëmë kur gjashtë persona humbën jetën pasi makina e tyre ra në humnerë në kanionet e Skraparit.
Aksidenti i rëndë ndodhi mbrëmjen e të hënës rreth orës 19:45, në segmentin rrugor Çorovodë-Grepck, rreth 2.5 km pranë Çorovodës, në vendin e quajtur kanionet e Skraparit.
Si pasojë e këtij aksidenti humbën jetën shtetasit Fatjon Feka, 23 vjeç; Vladimir Dulellari, 23 vjeç drejtuesi i makinës; Eni Guri, 21 vjeç; Xhulio Allko, 19 vjeç; Edison Çuko, 26 vjeç dhe Drilon Guri, 24 vjeç.
Sipas ekspertëve autoteknikë, shkak i aksidentit ka qenë humbja e kontrollit nga drejtuesi i automjetit tip Mitsubishi, me targa angleze, Vladimir Dulellari, i pajisur me dëshmi aftësie për drejtim automjeti.
Ndërkohë sipas ekspertëve rrugorë segmenti Çorovodë-Grepck, ku u regjistrua aksidenti është i pashtruar dhe i kalueshëm vetëm me mjete të larta.
Në vendngjarje shkuan forca të policisë rrugore dhe të Drejtorisë së Policisë së Qarkut Berat, efektiva të FNSH-së dhe forcat RENEA, por personat e aksidentuar kishin pësuar vdekjen e menjëhershme.
Operacioni për tërheqjen e trupave të personave të aksidentuar nga vendi ku kishte rënë automjeti filloi në orën 05:30 të mëngjesit dhe përfundoi rreth orës 10:30.
Gjatë operacionit të tërheqjes së trupave të shtetasve që humbën jetën në këtë aksident, forcat policore u ndihmuan edhe nga strukturat e Emergjencave Civile Berat, një grup sportistësh të Federatës Shqiptare Rafting Berat, si dhe një grup alpinistësh italianë.
mit/NOA
