Tiranë, 1 nëntor 2011, NOA – Avokati i ish zv.kryeministrit Ilir Meta deklaroi sot se do të ndërrmerren hapa ligjorë ndaj Dritan Prifti, pas deklaratave të tij një ditë më parë.
“Deklaratat e ish-ministrit Dritan Prifti se, ka patur asnjë takim mes avokatit të Metës dhe ekspertëve të video-përgjimit janë të pavërteta dhe të keqsajuara”, tha sot për mediat, avokati Petrit Serjani.
Gjatë konferencës së posaçme për shtyp, përfaqësuesi i Lëvizjes Socialiste për Integrim, Spartak Braho, ka pohuar se ekspertët që dhanë vlerësimin e tyre për video-përgjimin Meta-Prifti janë të specializuar, mjaft profesionalë dhe se ata konstatuan ndërhyrje e manipulim të saj. “U konstatuan ndërhyrje në transmetimin dhe në audion e saj, veçanërisht në pjesët e nxehta të asaj bisede të pretenduar. Kjo video nuk ishte asgjë tjetër veçse pjesë e një komploti dhe një skenari aferash politike. Dua të theksoj edhe një herë se përfundimet e arritura nga ekspertët shqiptarë, janë të njëjta me ato të ekspertëve amerikanë”, tha sot Braho. Avokati Serjani tha se Prifti ka vetëm staturën e dëshmitarit të sjellë nga prokuroria, e cila është organi që akuzoi Metën për marrje ryshfeti dhe korrupsion.
a.q/NOA
