Tiranë, 14 nëntor 2011, NOA- Kërkesa e Prokurorisë për riekspertimin e video-përgjimit Meta-Prifti, është rrëzuar pasditen e sotme nga Gjykata e Lartë.
Ndërkaq po sot trupa e gjyqtarëve vendosi që seanca e radhës të mbahet më 21 nëntor ku do të pyeten edhe 4 dëshmitarë lidhur me këtë video.
Prokuroria ka akuzuar tre ekspertët shqiptarë se kanë dështuar me ekspertizën që i kanë bërë video përgjimit Meta-Prifti dhe ka kërkuar të bëhet një riekspertizë nga e para.
Pas përgjigjeve që vetë ekspertët kanë dhënë lidhur me pyetjet e bëra nga organi i akuzës, Prokuroria ka deklaruar se kërkon një tjetër ekspertim, por këtë radhë me ekspertë të huaj, duke u shprehur se ekspertët shqiptarë kanë dështuar me punën e tyre, por kjo kërkesë nuk u mor për bazë.
Tre specialistët që realizuan ekspertizën e video- përgjimit ndaj ish- zv.Kryeministrit Ilir Meta, ripërsëritën qëndrimin e tyre se, video nuk është origjinale.
Ilir Meta akuzohet për korrupsion në kohën kur ai kryente detyrën e zëvendës Kryeministrit dhe Ministrit të Jashtëm, akuzë e ngritur në bazë të një video të regjistruar nga ish-ministri i ekonomisë Dritan Prifti.
Ekspertët e video-përgjimit Meta-Prifti, që ekspertuan orën kamera, Laptop-in e Dritan Priftit, deklaruan se nuk mund të provohet, që përgjimi i bisedës Meta-Prifti, të jetë bërë me orën kamera. a.y/NOA
