Tiranë, 15 nëntor 2011, NOA – Gjatë prezantimit të raportit për zhvillimet ekonomike në rajonin e Europës Juglindore, ku bën pjesë edhe vendi ynë, Banka Botërore deklaroi sot se Shqipëria ka borxhin publik më të lartë në rajon, raporton agjencia e lajmeve NOA.al.
Në raportin e BB-së bëhet me dije se borxhi publik është në kufijtë e nivelit të lejuar, andaj ajo apelon që qeveria të bëjë kujdes.
Numri i parë i raportit u bë publik sot paradite nëpërmjet një video konference në zyrat e Bankës Botërore, në Tiranë. Borxhi publik i Shqipërisë llogaritet deri në 59. 6 %, ndërsa defiçiti buxhetor në fund të muajit tetor të vitit 2011, është rreth 4 përqind.
Por, raporti citon gjithashtu se parashikohet, që efektet e krizës së Eurozonës të ketë ndikim të ndjeshëm edhe në ekonominë shqiptare.
Dhe një gjë e tillë argumentohet me ngadalësimin e rritjes ekonomike si edhe borxhi i lartë, madje ky i fundit shihet si me rrezik për shkak të nivelit të lartë.
Në raportin e Bankës Botërore thuhet se gjatë vitit 2011 rritja ekonomike në rajon është 2.5 përqind ndërsa për vitin 2012 kjo rritje do të ulet në 2.1 përqind.
Gjatë ditës së sotme Banka Botërore ka prezantuar numrin e parë të një serie publikimesh mbi zhvillimet ekonomike në vendet e Evropës Juglindore si një Shqipëri, Bosnje Hercegovinë, Kosovë, Maqedoni, Mal të Zi dhe Serbi.
a.q/NOA
