Mitrovicë, 26 korrik 2011, NOA – Marrja nën kontroll pas tre vitesh e dy pikave kufitare me Serbinë, ajo e Bërnjakës dhe Jerinjes në veri të Kosovës, nga Policia e Kosovës është cilësuar si një aksion jo i dobishëm dhe i pakonsultuar me BE-në nga përfaqësuesi i Bashkimit Europian në Kosovë, Fernando Gentilini.
“Operacioni i kryer mbrëmë nga autoritetet e Kosovës nuk ishte i dobishëm. Ai nuk është bërë në konsultim me bashkësinë ndërkombëtare dhe BE-ja nuk e ka miratuar atë”, u shpreh Fernando Gentilini, Përfaqësuesi Special i BE-së për Kosovën në lidhje me situatën në veri, citon radio “Evropa e Lirë”.
Ky aksion i policisë së Kosovës në zonën e banuar me shumicë serbe në veri të Mitrovicës u ndërmor mesnatën e mbrëmshme me vendim të qeverisë së Kosovës dhe nën kundërshtimin e serbëve të zonës që ngritën bllokada në kufi me makineri të rëndë.
Operacioni i policisë së Kosovës u krye për të rritur sigurinë pasi në të dyja këto pika në veri të Kosovës, serbët nuk zbatonin embargon e kalimit në doganë, ku kamionët serbë hynin në territorin e Kosovës në mënyrë të pakontrolluar.
Përfaqësuesi i BE-së Gentilini bëri thirrje për qetësimin e situatës në veri të Kosovës.
“Është thelbësore që situata të qetësohet tani dhe të kthehemi ku kemi qenë. EULEX-i është i gatshëm t’i ndihmojë autoritetet e Kosovës në këtë”, tha Gentilini.
Sipas tij dialogu është e vetmja mënyrë për zgjidhjen e çështjes së vulave të doganave dhe për rivendosjen e tregtisë së lirë në të dy drejtimet.
“Veprimet e njëanshme nuk mund ta zgjidhin problemin”, apeloi Fernando Gentilini.
RFE/mit/NOA
