Shkodër, 9 gusht 2011, NOA – Katër adoleshentë shkodranë kanë vënë pengesa në stacionin hekurudhor të Hanin të Hotit për të ndalur trenin e mallrave që shkonte drejt Tiranës.
Ngjarja ndodhi të hënën pasdite, në vendin e quajtur kthesa e Kombinatit, në lagjen Skënderbeg, pikërisht në afërsi të stacionit të trenit të mallrave në Shkodër.
Katër adoleshentët u kapën në flagrancë, ndërsa kishin vënë pengesa në linjën hekurudhore Hani i Hotit – Tiranë, me qëllim ndalimin e trenit të mallrave, që transportonte pije të ndryshme freskuese dhe alkoolike, në drejtim të Tiranës.
Të katër adoleshentët e ndaluar nga policia e Shkodrës janë 16-vjeçari F. L. banues në lagjen “Skënderbeg” në Shkodër; 14-vjeçari M. L. banues në lagjen “Skënderbeg” në Shkodër; 14-vjeçari A. K., banues në lagjen “Skënderbeg” në Shkodër dhe 15-vjeçari B. B., banues në fshatin “Hot i Ri”, Komuna Rrethina, rrethi Shkodër.
Adoleshentët do të ndiqen në gjendje të lirë për vjedhje të mbetur në tentativë dhe pengim të qarkullimit të mjeteve të transportit rrugor.
mit/NOA
