Vatikan, 5 shtator 2011, NOA – Selia e Shenjtë pritet të njohë së shpejti pavarësinë e Kosovës. Lajmin e bëri publik gazeta kosovare Bota Sot, e cila citon fjalët e Juliusz Janosz, delegat apostolik i Vatikanit për Kosovën. Media kosovare shkruan se pas meshës së shenjtë të mbajtur të dielën në Prizren, Janosz tha se prania e delegacionit të Vatikanit në Kosovë është dëshmi për njohjen e shpejtë të pavarësisë së Kosovës. “Fakti që nuk jemi të varur nga Nunci i Beogradit, apo prej Nuncit të Shqipërisë, por e kemi një delegat apostolik e ka një domethënie që duhet të lexohet në këtë kuptim”, është shprehur Janosz. Delegati apostolik i Vatikanit për Kosovën Juliusz Janosz, do të marrë pjesë sot në Festën e Nënë Terezës, e cila do të mbahet në Katedralen “Nënë Tereza” në Prishtinë. mit/NOA
